Bajet 2017: Inklusif ke pemaik, pengelantang semua rayat

KUALA LUMPUR: Menteri Besai Datuk Seri Najib Tun Razak kemari maya bejuraika Bajet 2017 ngenukuka perintah seruran komited untuk ngemujurka bajet lalu mangku tangggungpengawa nengah chara nguna belanja ke manah ti mungkur semua segmen rayat.

"Bajet tu ukai digaga ngemeratka seraban rayat aja, tang digaga nengah gaya ti inklusif ke pemaik enggau pengelantang semua rayat," ku Najib ti mega Menteri Wang lebuh bejuraika Bajet 2017 di Dewan Rakyat ditu kemari.

Entara segmen ti teulihka pemaik ari Bajet 2017 iya nya pengereja pengawa perintah ti penyampau diatu manggai 1.6 juta, penerima Bantu Rayat 1Malaysia (BR1M),peranak menu a pesisir, raban orang berikan, raban nembiak, rambau kedua Felda, Felcra enggau Risda, deriba teksi enggau orang dagang.

Dalam Bajet 2017 berambaika jakun 'Menjamin Perpaduan & Pertumbuhan Ekonomi, Menghemah Perbelanjaan Inklusif, Mensejahtera Kehidupan Rakyat Seluruh' nya, Najib udah mantaika perambu RM260.8 bilion, iya nya RM214.8 bilion ungkup belanja ngaduka pengawa lalu RM46 bilion ungkup belanja pemansang.

Penyampau nya enda nyengkaum 'simpanan luar jangka' ti sepenyampau RM2 bilion, ku iya.

Ku Najib, Bajet 2017 digaga bepelasarka lima prinsip enggau philosophy perintah nyengkaum ngemeratka penyerakup nasional ba pengawa nempa menua bansa sereta ngintu pemaik, penegap konstitusyen enggau undang-undang sereta pengelikun menua.

Ku iya, konsep ti pemadu besai reti dikemeratka dalam Bajet 2017, nuju status menua maju iya nya "pengelantang raban bansa".

"Bajet tu ukai semina pasal penatai pemisi aja, tang bekaul enggau kualiti pengelantang pengidup rayat, baka likun ari pengawa ti jai,ulih ngasaika rampa menua ti beresi sereta mayuh bengkah seni enggau adat asal bansa," ku iya.

Konsep nya mega ngemeratka pemujur pelajar ti tinggi, mengangkatka ikas peninggi penemu enggau intelektual, servis pengerai ti manah sereta ngembuan akses ba perengka pengangkut mensia mayuh ti efisiyen, ku iya.

Menteri Besai nya mega madah, ke pengelantang rayat, perintah deka terus bejalaika projek enggau program 'bepelasarka rayat' di mengeri enggau pesisir.

Dalam Bajet 2017, iya mega bisi meranbu ngelekatka 97,000 iti lampu jalai enggau 3,000 iti lampu LED di 7,500 buah genturung pendiau lalu nyendiaka RM300 juta ba 'Tabung Penyelenggaraan 1Malaysia' dikena ngemanahka perengka guna ba kandang flat enggau113 Program Berumah Rayat ba kandang pasar enggau pesisir pasar.

Ku Najib, pengeran enggau inisiatif stimulus ekonomi sereta tujuh pakej bajet ti dipejalaika sebedau tu udah ngujungka ekonomi Malaysia tegap sereta mangkang ba jalai ti positif.

"Nengah semua inisiatif ti dipejalaika perintah, ekonomi kitai ngerembai enggau manah, nitihka chuan 'Purchasing Power Parity', Malaysia udah nyadi sebuah negara ti ngembuan penatai pemisi jelan pemesai, ngalahka mayuh menua bukai ukai semina di Asia, tang di serata dunya," ku iya.

Ku iya, KDNK PPP per kapita rayat Malaysia udah niki ari US$23,100 ba taun 2012, ngagai US$26,891 ba taun 2015.

Najib ngenggaika pelaba sekeda piak ti madahka Malaysia deka bankrap nitihka penemu agensi ngeletakka penuduk sesebuah menua ba renggat antarabansa baka Fitch ti meri penuduk A-, iya nya sama tumpuk menua ke saiz ekonomi besai agi sereta maju baka Korea, China, Jepun enggau Taiwan. "leka jaku 'bankrap' nya jauh endar ari kamus ekonomi Malaysia," ku iya.